Bixêr hatin Myriam - Navenda şêwirmendî ya ji bo jinên penaber li Schleswig-Holstein, Almanya

Saziya karê jinê ya Dêrê Bakur (Frauenwerk der Nordkirche)

Saziya karê jinê ya Dêrê Bakur rêxistineke bo wan jinên girêdayî Dêra binyada Evangîlî-Loteran li Almanyayê ye. Ango bo jinan li Hamburg, Mecklenburg-Vorpommern û Schleswig-Holstein.

Ev sazî karê jinan organîze û bi rêkûpêk dike. Saziya karê jinê, karê jinan organîze û bi rêkûpêk dike. Ew jinan tîne cem hev û li ser hevkariya wan dixebite. Guhdan bi wê yekê tê kirin, da jin bi awa û şêwazên xwe yên taybet cîhanê bibînin. Kar bi awayekî berçavkirî tê pêkanîn. Weke mînak di rêya geştên jinan ên organîzekirî û semînaran re û herweha di rêya pêşengeh û waneyan re. Ev çalakî her dem li ser pirsgirêkên jinan dixebitin. saziya Jinê (Frauenwerk) dijî neheqîtiya li hember jinê yan jî kêmbûna mafên bidestxistî dixebite.

Saziya karê jinê nûnertiya jinên têkildar bi dêrê re dike. Ew jinên ku di nav olnasiya femînîst de dixebitin û xwe weke jinên bawermend di civak û dêrê de dibînin. Saziya karê jinê herweha hin rêxistinên din ên civakî-diyakonî dihewîne, mîna navenda şêwirmendiyê Myriam, dezgeha Contra û navenda şêwirmendiyê ya pispor cara * SH. Pêşniyaziyên saziya karê jinê bo hemû jinan in.

 

Şêwirdarîya hiqûqî

Şêwirdariya me tenê bo jinan e û bi taybetî bo wan ên ku pirsên wan ên qanûnî derbarê penaberî û koçberiyê  hene, weke

• pêvajoyên penaberiyê
• ji bo lêpirsînê
• li mafê mayînê
• Biryara BAMF "Daîreya Koçberiyê Ji bo Koçber û penaberan
• Darizandinên qanûnî
• Li ser mijarên taybetî ye Jinan.

Ji bo şêwirmendiyê divê di pêşiyê de were zelalkirin ka wergêrek hewce ye. Ji kerema xwe hemî kaxez û belgeyên heyî ji şêwirmendiyê re bîne. Tu dikarî herwextî jivanekê ji bo hevdîtinê bixwazî.

Em çi pêşkêş nakin

Em nikarin li xaniyan begirin, ne jî navbeyniyê bikin. Em nikarin ligel jinan biçin Jobcenter/doktor/Sozialamt . Em nikarin muakilan qebûl bikin û nûnertiya jinên ku li şîretan digerin bikin.

Ji bo navendên şêwirmendiyê yan alîgir ên din

Em pêşkêşî we dikin,

• em xwe li cem we yan di grûpên jinan de bidin nasîn
• li ser pêvajoya penaberiyê bipeyivin
• ji bo jinûve, bi taybetî li ser pêvajoya
• penaberiyê bersiv bidin herweha
• ji bo agahdarî li ser mafên jinan û karûbarên şêwirmendiyê li Kiel.

Bi me re bipeyivin!☺

Projeya me ya nû: Çîroka te girîng e!

Belkî tu dizanî ku: di jiyana rojane de li Almanyayê gelek astengî bo piraniya kesan hene û wisa jî pêdivî bi organîzekirina gelek tiştan heye. Lewra yekcaran dem nîne ku mirov xwe bi tiştine xweş mijûl bike û xurtahiyên kesane bibîr bixe. Ji bo vê yekê em dixwazin di projeya xwe de lê bigerin: ka xurtahiyên te çi ne? Çi te şad dike? Kî û çi bo te girîng e? Çi ye ew tiştê tu kiriye ev mirov?

Da em armancên xwe pêk bînin, em rêbazên (metodên) jînenîgar (biyografî) bikar tînin. Ev dê ji nêz ve bi te û beşdarên din re werine gengeşekirin. Eger pirsên te li ser mijarê hebin an jî tu bixwazî bêhtir fêm bikî, tu dikarî bi me re biaxivî. (Têkilî)

Armancên projeyê - Ew çi bo min pêşkêş dike?

• (Dîsa) vedîtina xurtahiyên kesî li ser bingeha çîroka jiyanê.
• Bidestxistina dem û cih ji bo çîroka xwe.
• Avakirina têgihiştineke bêhtir ji rêçikên jiyana kesî û afirandina hêzê bo jiyana rojane.
• Parvekirina rewşên jiyanê yên weke hev an jî cuda ligel jinên din.
• Hêz bo aniha û pêşerojê.

Pêwîst e:

• Em ne bi awayekî bijîşkî kar dikin. Em ne doktor in, ne jî bijîşk in.
• Hemû bi minêkarî ye (dilxwazî ye), bi bawerî û bê pere ye. Ango tu ne mecbûr î ji me re biaxivî, lê helbet tu dikarî.

Proje bo kê ye?

Ew bo hemû jinên ku di salên dawî de nû hatine Almanyayê

Li kû, Çawa, Çi?

Cihê hevdîtinê li Kiel (Kîl), Almanya ye. Em 3-4 caran di grûpê de tên ba hev. Li gorî pêdiviyê hevtîtinên tenahî dikarin werine çêkirin. Hemû hevdîtin dê ji hêla wergervanekê ve bêne duristkirin. Ango ti zanyariyên ziman nayên xwestin. Guhdana zarokan jî pêkan e, lê dive berê were gengeşekirin.

Paşxan

Proje ligel hevkariya çar saziyên cuda yên li jêr tê birêvebirin

• Asylzentrum Tübingen e.V. (Antragstellerin und Projektkoordinatorin),
• die Mitternachtsmission Fachberatungsstelle für Betroffene von Menschenhandel in Heilbronn,
• die SOLWODI Fachberatungsstelle in Fulda
• û em.

Diravdayîna vê projeyê ji hêla nûnerê hikûmeta Federal a bo koçberî, penaberî û tevlîlêbûnê ve tê bidestxistin û ew dê heta çileyé pêşî 2021 berdewam bike.

Jin dîrok xwe dibêjin

Sara, 36 salî ye, ji Iraqê

Ez 36 salî me. Ez Iraqî me û xwedî derçûneke zanîngegê me. Ez dixwazim çîroka xwe bi we re parve bikim. Çîrokeke tal a derheqê jiyanek ku ez ji ti jinên din re hêvî nakim, lewra min ji ber kevneşopî û çanda eşîrî tundî dît.

Çîrok di zaroktiya min de destpê dike, ku pir dihwar bû. Heft birayên min hene. Wan hêz û kontrol li ser jiyana min wek keçikê dikirin. Dema ez bûm nûciwan yek ji pêngavên herî dijwar ên jiyana min destpê kir.

Birayên min zext li min dikirin û li  min dixistin. Ez rastî gelek tundiyê hatim ji hêla birayên xwe ve.

Di temenê 20 salî de, xweştirîn dem di jiyana jinên ciwan de, ku hêviyên mezin hene û xewnên bedew li ber çavan in. Dema jin dixwaze hevjînê xwe hilbijêre. Ew kesê ku dixwaze jiyana xwe pêre derbas bike. Lê ew hemû bidest min neket, lê belê jiyana min wergeriya kabûsek, ku hemû hêviyan min ew bû ez jê hişyar bibim. Vê yekê destpê kir dema ez hatim mecbûrkirin, da ez bi pismamê xwe re bizewicim, yê ku berê zewicî bû û 8 zarokên wî hebûn. Ew nexwende û kevneperest bû. Wî gelek zor li min dikir û bixwe di temenê bavê min de bû. Du zarokên min çê bûm û jiyana min di kabûsê de berdewam bû. Semaxa min êdî li hember zordarî û nezaniya wî nema, nemaze ji ber cudahiya mezin a di navbera temen û xwendina me de.

Ti kes nikare bîne ber çavan, wan derdên min her roj ji ber wî dikişandin. Dema ez cara sêyemîn ducanî bûn û wî bihîst ku dîsa keç e, wî xwest ku zarokê bikuje û bi awayekî xeter li ser jiyanê, li min xist. Weke ku ez di ber zayenda wê zarokê de berpisyar bûn û erkê min bû ku tenê kuran jê re bînim. Şûnde wî ez mecbûr kirim, da zarokê jiber xwe bikim.

Ji wê kêlîkê ve min nema tamûl kir, ez li cem wî bimînim. Min biryar da birevim û li gel keçikên xwe ber bi devereke dûr ve biçim da ew jî rastî heman qedera min neyên. Em reviyan û me karîbû em çend salan xwe ji wî veşêrin. Di vê demê de ez di aştî, rêz û serbilindiyê de jiyam lê mixabin ew bi ser cihê me ve bû û hat mala ku ez lê dijiyam da min vegerîne. Wê gavê em bi giranî rabûn hev, ji ber min nedexwest pêre biçim û di nav pevçûnê de, wî keça min a 8 salî kuşt.

Ez ew qas bêhêvî bûm û tiştê ku ji min re ma, tenê duayên min ji Xwedê re bûn, ku ji wê jiyana tirsnak rizgar bibim. Şûnde wî cezayê zindanê wegirt û ez bi biryara dadgehê ji wî hatim veqetandin.

Min dixwest ez ji welêt birevim ji ber ku ez giham wê rewşa acizbûnê, ku nema dixwest jiyana xwe bidomînim. Bi bextewarî, min derfet dît ku ez biçim Almanyayê û li wir daxwaza penaberiyê bikim. Piştî ku ez hatim vir, Min hest kir weke ku ez nû jidayik bûm û jiyana min hêdî hêdî dest bi başbûnê kir.

Ji bo ku ez tenduristiya derûnî û rewşenbîrî ji nû ve bidest bixim, min di ZIP - li Navenda Psychareseriya ativeareseriyê ya Kiel de piştgirî û şêwirmendî wergirt. Dûvre jî ez hatim navenda şêwirmendiyê Myriam, ku di hemî pêvajoyên pêş de roleke girîng di pêşkêşkirina agahdarî û şêwirdariyê de lîst.

Jiyana min bi tevahî guherî dema ku min di enstîtuyê de bi mêrekî taybet re hevdîtin kir û  ez fêrî elmanî bûm. Niha em zewicîne û zarokeke me bi hev re heye. Keça min dê êdî xwe tenê hest neke, çimkî wê niha xwişkeke nû heye. Ez nikarim hestên xwe yên bextewariyê diyar bikim dema ku ez dibînim ka ew ji xwişka xwe ya biçûk çiqas hez dike û lê xwedî der dikeve.

Ez gelekî kêfxweş im ku malbata min a biçûk heye, ji min re bû alîkar ku ez ji nû ve hêz û hez bikim ku jiyana xwe li vir bidomînim. Carinan jiyan ji me re pêşniyaz wisa da merov bi hêz û bîhnfireh be.

Li dawiyê, ez dixwazim spasî û pênasîna xwe pêşkêşî Hikûmeta Alman bikim ji bo ku derî li min vekiriye û ji min re jiyaneke bi rûmet û ewlehî pêşkêş dike. Ku ew hewl dide birînên min ên kûr derman bike û ji min re bibe alîkar da ez dîsa ji malbateke nû re bibin dayik û jinek.

Tu çi ji jinên din re pend (tewsiye) dikî yan dibêjî?

Ez bawer dikim ku her jin zehmetî û çîrokên wê hene. Belê bi bawerî, bîhnfirehî û biryardariyê, em ê biser bikevin û jiyana ku em dixwazin bidest bixin.

Semhar, 23 salî, ji Eritrya

Ez 19 salî bûm dema ku min biryar da ji welatê xwe Eritrya derkevem, ji bo ez li pêşerojeke baştir bigerim, lewra di welatê min de sîstema dîktatoriyê ye.

Geşta min bi çûyîna Etyopyayê destpê kir. Li wir ez salekê di kampeke penaberan de mam, ta ku derfend bidest min ket, ez bi alîkariya qaçaxçiyekî di rêya Sûdan re biçim Lîbyayê. Sê mehên din jî derbas bûn ta ez gihiştim Îtalyayê û ji wir ez bi tirênê çûm Swêdê. Li wir jî ez demeke kurt di kampeke penaberan de mam, ta li dawiyê ez gihiştim armanca xwe bi hatina Almanyayê. Di wan herdu salan de min gelek dem û rewşên dijwar derbas kirin, weke birçîtî û tîbûna giran. Min mirina mirovan dît. Ez li ser tecawiz, destdirêjî û jiberkirina zarokan jî şahid bûm.

Dema ez gihiştim Almanyayê, min xwest li vir bimînim ji ber ku pismamê min li vir dijî. Lê min çapên tiliyan li Swêdê dabûn ji ber ku min xwe weke penaber teslîm kiribû, lewma jî Almanyayê penaberiya min qebûl nekir û dixwest min vegerîne Swêdê. Di wê demê de, min alîkarî ji nivîsgeha kampa xwe xwest û di rêya wê re têkilî bi dezgeha şêwirmendiyê Myriam re hate girêdan. Ew jî şêwirmendî û piştgiriyê ji bo jinên penaber pêşkêş dike. Karmendan bi hevkariya li gel saziyên din alîkariya min kirin da daxwaznameya penaberiyê ya dêran were çêkirin.

Dêrekê ez parastim û min karîbû demekê li wir bijîm ta ku dema veguhestina min derbas bû û êdî Almanya bû berpirsyara min. Piştî du mehan min xwe veguhst kampê û min karîbû pêvajoyên penaberiya xwe birêve bibim. Piştî lêgerîneke dirêj jî min karîbû ez xaniyekî ji xwe re bidest bixim û bo vê yekê ez gelekî şad im.

Di heman demê de min psîkoterapî (îlaca derûnî) çê kir û tevlî gelek danûstandinên ZIPê - Navenda derûnsaziya civakbendî li Kiel- bûm ta ku tenduristiya min baştir bû. Da ez karibim êdî jiyaneke tendurist bidomînim.

Ez fêrî Almanî bûm heta asta B1 û paşê min karek bidest xist û êdî bi temamî serbixwe me. Ez aniha êdî ewle me. Min mafê mayînê bo salekê wergirt û rewşa min li Almanyayê aram e.

Ez bi çavên hêviyê li pêşerojê dinêrim. Ez bi hêvî me karînên ziman baştir bikim bo asteke bilindtir. Ji bilî wê jî, ez dixwazim bixwînim û cihê xwe di cîhana kar de bigirim.

Tu çi ji jinên din re dibêjî/ pend (tewsiye) dikî?

Ez dixwazim ji hemî jinên ku çîroka min dixwînin re bêjim: Rewşên jiyana te çawa dibin, bila bibin. Biryar a te ye: radest nebe, xwe teslîm neke. Rabe ser xwe û li gorî dîtina xwe bijî. Derfetan neberde, hêviyê wenda neke û her dîsa bibzive.

Di dawiyê de, tişt dê baş derkevin û tu dê tiştê dixwazî bigirî.

Yasmîn ji Iraqê

Ez jineke kurdê Iraqê me û bûne du salên min li Almanyayê. Ez li Iraqê zewicîm û piştî demeke kurt hevjînê min çû Almanyayê. Piştre ez li dûv wî çûm Almanyayê û ji bo vê yekê divyabû ez di rêya Tirkiyê re rêwî bibim û baweriyê bi qaçaxçiyan bînim.

Mixabin peywendiya min bi hevjînê min re ji destpêkê ve ne li ser bingeha têgihiştin û rêzgirtinê hatibû avakirin. Hîn em li Iraqê bûn gava wî ez bi kuştinê tehdît kirim, ji ber nelihevkirinekê. Dema ez gihiştim Almanyayê, hêviya min hebû ku ew hatibe guhertin lê mixabin jiyana me bi heman awayî berdewam kir. Min hewil da sebrdar bim û min gelek derfet dan wî, lê ez bawer im hevjînê min bi derûnî nexweş bû. Ew di wê baweriyê de bû ku min ew dixapand û her dixwest jiyana min bi tevahî kontrol bike. Wî têkiliya bi kesên din re li min qedexe kir û pere û dahatên min bi giranî xistin bin kontrola xwe de. Wî deriyê malê li min asê dikir û ez bo demên dirêj bi tenê li malê dihiştim. Min biryar da ku ji wî veqetim. Xanimekê ku ez nas dikim, saziya şêwirmendiyê Myriam bo min pend kir. Min şîret wergirt û li gel alîkariya wê hatim mala jinê. Ew jî ciheke ku jinên xwedî alozî tê de parastin û piştgiriyê diwergirin.

Myriam bi destê min girt û piştî şeş mehan pêvajoya daxwaznameya penaberiya min bi dawî hat û min mafê mayînê wergirt. Piştî çend mehên din ez ji mala jinê derketim û xwe veguhest mala xwe. Ev bo min gava yekemîn bû ber bi jiyaneke aram ve û tê wateya destpêkeke nû ya jiyana min a nû. Armanca min jî ew e, ku ziman fêr bibim û tevlî civak û kultura almanî bibim, da ez karibim xwe bipêşve bixim û bibim xwedî pêşerojeke baştir. 

Tu çi ji jinên din re dibêjî/ pend (tewsiye) dikî?

Ez ê her jinê şîret bikim ku netirse û gava ku pirsgirêkên wê hebin, şêwirdariyê bixwaze.

Muna ji Somalê

Ez jineke Somalî me, ku rastî gelek dijwariyê hatiye. Ev derdê mezin dê neyê jibîrkirin û dê her bandoreke mezin li ser jiyana min bike. Mirov nikare li ser vî derdedî bi kurtî biaxive, ne jî binivîse lê ez dixwazim li ser vê aloziya giran bi giştî biaxivim.

Dema ez 12 salî bûm, ji hêla jinekê ve hatim revandin. Wê ez birim Erebistanê û ez dam malbatek Ereb. Pirsgirêkên min wê rojê destpê kirin û ez bûm xulam ji bo tevahiya malbatê.

Wan bi berdewamî sixêf dikirin min û ez weke zindaniyekê di malê de dihiştim. Bi salan wan bi awayekî neînsanî miamelya min dikirin.

Min hewil da birevim, lê bê serkeftin û her min hewil dida, her rewşa min dijwartir dibû. Bi vî rengî jiyana min di nav malbatê de berdwam kir ta rojekê xwedana malê bûyereke trafîkê çê kir. Herdu destên wê şikestin û derbeyek li serê wê ket, ku ew seqet bû û li ser kursiyê dûlab rûnişt. Bi wî rengî wê nema karîbû li ber xwe bide û her gav pêwîstî alîkariya kesên din bû. Rojekê malbat çû betlaneyê û ez bi tenê li gel xewdana malê hitşim, bo guhdanê. Derfeta revînê wê gavê bo min çê bû û di wê rojê de ez reviyam. Ew roj a şadtirîn bû di jiyana min de. Piştre derfeta revîna ber bi Ewropayê ve û jiyana li Almanyayê bi dest min ket. Ez êdî rizgar û serbixwe me. Derfet peyda bû da jiyaneke şad destpê bikim. Ez spasiya her kesî dikim, ku alîkariya min kir û bi taybet hikûmeta Alman.

Tu çi ji jinên din re dibêjî/ pend (tewsiye) dikî?

Ez dixwazim ji hemî jinên ku nû gihişine re bêjim, divê ew hêzdar bin û wêrek bin, da alîkariyê biwaxin. Ti carî hêviyê wenda nekin.

Leyla, 25 salî ji Sûriyê

Ez Leyla me, temenê min 25 e û ji Sûriyê me. Ez li gel malbata xwe hatim Almanyayê. Me mafê mayînê wergirt û jiyana min aram xuya dikir ta ku rojekê tiştekî nelibendîmayî çê bû.

Malbata min ji bo min daweteke kevneşopî lidar xist. bi zilamekî re ku min bixwe bi zor nas dikir.

Min ji xwişk û birayên xwe re got ku ez naxwazim bi wî re bizewicim, lê wan daxwaziya min qebûl nekirin û bi tundî bersiv dan.

Di heman demê de min zilamek nas kiribû û min ewqasî jê hez dikir, ku min dixwest bi wî re bim. Lê ez ji xwe ne bawer bûn li ser wî ji malbata xwe re biaxivim. Kevneşopiya me ya teng rê li ber me digire, em gotina dêbav û endamên malbatê red bikin. Lewma wêrekî li cem nebû ez dijî planên vê zwacê biaxieim.

Ez û hevalê xwe li alîkariyê digeriyan û me têkilî TELEFONA ALÎKARIYÊ - Hejmara telefonê ya jinên rastî tundiyê hatine- Rewşên awarte û wan  Myriam (saziya şêwirmendiyê ya ji bo jinên penaber) bo me tewsiye kirin.

Ji myriam me hine agahdarî standin, ku li Almanyayê ti kes nikare bi zorê were zewicandin û her kes xwedî mafê hilbijartina hevjîna/ê xwe ye. Li ser gelek biryaran em ji hêla Myriam ve hatin şîretkirin.

Herweha me nêrîna îmamekî mizgeftekê wergirt me pirsên li ser zewacê ji wî kirin. Wî jî got, ku fetwak heye dibêje, zewaca bê erêkirina jinê şaş e.

Nakokî di navbera min û malbatê te berfireh bû, ji ber ku wan nikarîbûn dev ji xwesteka xwe berdin, da ez bi wî zilamî re bizewicim. Min gelek gef ji aliyê malbata xwe ve wergirt, lewma jî me bar kir bajarekî din, da em jiyaneke nû destpê bikin.

Niha ez bi zilamekî re zewicîme ku dilê min lê digere. Digel hemî zahmetiyan, min dilê xwe şopand û di demek nêzîk de em ê xwediyê zaroka xwe ya yekem bin.

Tu çi ji jinên din re dibêjî/ pend (tewsiye) dikî?

Ez dixwazim ji hemû jinan re peyamekê bişînim:

Ku ew mafê xwe bikar bînin da bo jiyana xwe, ew xwediyên biryarên xwe bidin û ji hêla tirs û kevneşopiyan ve neyên kontrol kirin.

1. Zaroka min Alman e, eger ew li Almanyayê jidayik bûbe?

Na, tenê dibe eger dayik an bav hemwelatiyê Almanyayê be. Rewşeke taybet jî heye, dema yek ji dêbavan bi kêmanî 8 salan li Almanyayê mabe û şertên din jî pêk bîne.

Ka gelo jidayikbûna zaroka te li vir bandorekê li ser pêvajoyên penaberiya te yan mafê mayînê dike yan na. Ev yek grêdayî gelek şert û mercên din e. Eger pisrên te li ser vê mijarê hebin, tu dikarî werî ba me bo şêwirdariya qanûnî. Têkilî

2. Pêvajoya penaberiya min li gel malbatê birêve diçe û dixwazim ji hevjînê xwe veqetim. Ez dikarim daxwaznameyeke penaberiyê bo xwe (li gel/bê zarok) çê bikim?

Ne pêwîst e, tu daxwaznameyeke nû çê bikî, lê belê tu dikarî pêvajoya xwe (û ya zarokan) ji ya hevjînê xwe cuda bikî. Tu yê êdî bibî xwediya povajoyeke kesane û dê hevdîtineke lêpirsînê bi tenê hazir bibî, eger hûn hîn li yekê amade nebûbin. Piştre tu yê (û zarokên te) payemekê wergirî. Eger pêdiviya te bi alîkariyê hebe ji bo cudakirina pêvajoyan, tu dikarî werî ba me bo şêwirdariyê. Têkilî

Eger te hevpeyvîn berê li gel hevjînê xwe çê kiribî, lê te hîn ti peyam newergirtibin, derfend heye tu careke din nivîskî yan jî di hevpeyvîneke din de, sedemên xwe yên kesane ragihînî.

3. Ez di rêya Hevgîhandina malbatê re hatim Almanyayê û dixwazim ji mêrê xwe veqetim. Ez dikarim destûra rûniştina xwe bistînim?

Gelek dibetî hene. Li vir, ew gelekî girêdayî rewşa te ya kesane ne. Di şêwirmendiyê de em dikarin dibetiyan bi te re nîqaş bikin. Têkilî

4. Pêvajoya penaberiyê ango hevpeyvîna mafê penaberiyê çawa birêve diçe?

Vîdyoya jêrîn pêvajoyê û mafên te yên hevpeyvînê bi kurtî şîrove dike. Eger tu bixwazî, em dikarin te ji bo hevpeyvînê amade bikin! Têkilî

5. Ez dixwazim xwe ji mêrê xwe berdim, ez çi bikim?

Li Almanyayê mafê her jin û her mêrî heye xwe berde û razîbûna ti kesên din nayê xwestin. Pêşî divê tu bi parêzereke/î mafên malbatê re hevdîtinekê pêk bînî. Bo wan gerke were naskirin, ka zewaca we di dewletê de qeydkirî ye yan jî olî/ ayînî (merasimî) hatiye girêdan. Parêzer dê ji te re mafên te ên din zelal bikin û dê piştgiriya te bikin tu wan bistînî.

6. Kîjan mafên min ji hêla zarokên min ve hene piştî cudabûn/berdanê?

Bi binyatî ji hêla zarokan ve her dayik û bav li Almanyayê xwediyên heman mafan  in. Li Almanyayê parêzerên pispor hene, ku di warê zagona malbatê de zana ne û dikarin di dijberiyan de mafên te tekez bikin. Gerek e tu di her rewşê de şîretan ji wan wergirî.

7. Daxwaznameya penaberiya min (beşkî) hat redkirin. Ez çi karim bikim?

Divê tu di zûtirîn dem de li saziyeke şêwermendiya koçberiyê yan jî parêzerekê/î bigerî, ku di warê koçberî/penaberiyê de pispor be.

Ew pêwît e, ji ber ku rakirina dozekê dijî biryara neyênî bi demê sînorkirî ye. Mixabin ev sînora demkî jî gelekî kurt e (yek an du hefte ye). Divê tu li şêwriê bigerî, da tu nas bikî ka doza te dê biser bikeve û ka çi gav piştre girîng in. Van jî gerek e tu li gel parêzeran gotûbêj bikî (Têkilî). Eger tu ti parêzeran di sînora demkî de bidest nexî, tu dikarî bi xwe dozê li hember biryara neyênî rabikî. Em dikarin di vî warî de piştgiriya te bikin, eger tu ne dereng werî cem me.

Eger te mafê mayînê yê salekê standibe (ango mafê parastinê yan ê dijî koçkirinê) tu dikarî li dijî vê biryayrê dozekê rakî, da tu biryareke parastinê ya baştir bidest bixî. Ka gelo daxwaznameyeke bi vî rengî dê biser bikeve, divê tu li gel parêzera/ê xwe yan jî li gel saziyeke şêwirdariyê guftûgo bikî.

8. Di rûniştina min de (di hevpeyvînê de) min ne her tişt got, ez çi karim bikim?

Eger te hîn ti peyam derbarê hevpeyvîna xwe de newergirtibin, tu dikarî bi binyatî çîroka xwe nivîskî yan jî di hevpeyvîneke din de parve bikî. Ka gelo dê hevpeyvînîke din bo te hebe, ev biryara BAMFê ye.

Lewma di vê rewşê de gerek e tu biçî cem saziyeke şêwirdariyê yan jî parêzerekê/kî.

Eger te berê peyamek wergirtibî naxwe ew êdî mixabin dereng e ,ku tu tiştekî li çîroka xwe zêde bikî. Eger tu herhal bixwazî dijî biryarê gilî bikî, divê tu li gel parêzera/ê xwe biaxivî, da ew karibe dadgehê di pêvajoya gilî de agahdar bike.

9. Ez ji bo parastina nîştecîhê / salek nîştecîhê an jî nîştecîhê mayînde ye û dixwazim malbata min werin Almanya. Ma ev gengaz e?

Tu dikarî di roja îroyîn de daxwaza hevgihandina malbatê bikî, tenê dema te mafê mayînê yê 3 salan wergirtibî.

Ji 1ê tebaxa 2018an ve, kesên xwedî biryarên parastina demkî jî dikarin doza hegihandina malbatên xwe bikin. Hêjayî bibîrxistinê ye, ku li seranserî Almanyayê tenê 1000 kes di mehê de dikare derbasî welat bibe. Li gel parêzerekî biaxive. Herweha tu dikarî agahiyên bêhtir li ser malperên Înternêtê wergirî.

Hevgihandina malbatê mixabin tenê ji bo nûciwanan û hevjînan mumkin e. Eger tu bixwe kêmî 18 salan bî, tu dikarî dêbavên xwe bînî Almayayê. Ciwanên zêdeyî hijdeh salan û zarokên xizman nikarin mixabin tevî proseya hevgihandinê bibin. Tevî wê jî, gerek e tu li şêwirê bistînî.

Divê tu di dema sê mehan de ji wergirtina biryarê doza guhestina malaba xwe bikî. Vê yekê tu dikarî di rêya balyozxaneya Alman li derve yan jî nivîsgeha koçberiyê re nivîskî pêk bînî. Sê meh derbas bibin beyê te doza xwe kiribî dê hevgihandina malbatê gelekî zehmet bibe, ji ber ku şert û merc dê werine guhertin. Di rewşeke wisa de divê tu têkilyê bi parêzerkê/kî re girê bidî.

10. Dêbav û endamên din ên malbatê divên ez bi kesekî re bizewicim, ku ez naxwazim. Ka ez çi karim bikim?

Zewaca bi zorê li Almanyayê qedexe ye. Mafê te heye bi azadî biryar bidî, ka tu dixwazî bizewicî û bi kê re. Têkiliyê bi kesekî cihê baweriyê re girê bide (weke mînak, mamoste, saziya şêwirmendiyê, rêvebiriya kampê (jîngehê), Jobcenter, hwd.) an jî bi me re. Em dikarin te bi awayekî nenas şîret bikin û em ti tiştî nakin ku dijî daxwaziya te be yan jî tu nas nekî. Wisa jî tu karî biçî cem polîsê û parastinê ji wan bixwazin. Eger bi dilê te be, polîs dikarin te biguhezin maleke jinê, da tu pêşî bigihî cihekî aram. Li malên jinê, jinên ku li parastinê digerin bi hev re dijîn. Navnîşanên wan malan nepenî ne.

11. Hevjînê min li min dixe/min kontrol dike/min di malê de asê dike/perê min distîne/têkilya bi malbat an hevalan re qedexe dike. Ez êdî nema tamûl dikim û pêdiviya min bi alîkariyê heye.

Eger tu ji mêrê xwe bitirsî, tu dikarî parastinê li maleke jinê wergirî. Li malên jinê ên Almanyayê, hemû jinên ku rastî tundiyê hatine li gel zarokên xwe parastinê wergirin. Li piê cihan nivîsgehên şêwirmendiyê jî peyda dibin, ku bo hemû pirsên te amade ne. Navnîşan jî nepenî ye. Mayîn li mala jinê bi minêkarî ye. Tu dikarî her gavê ji wir derkevî.

Eger tu ji xwe ne bawer bî, ku berdanê dixwazî, tu dikarî herdem doza şêwirê bikî. Em dikarin bi rengî nenas te şîret bikin û em ti tiştî nakin ku dijî daxwaziya te be yan jî tu nas nekî.